Judg 13 | NdeIBE | STEP | Abako-Israyeli benza okubi njalo emehlweni kaJehova, ngakho uJehova wabanikela ezandleni zamaFilisti okweminyaka engamatshumi amane.

Judges 13

Ukuzalwa kukaSamsoni

1 Abako-Israyeli benza okubi njalo emehlweni kaJehova, ngakho uJehova wabanikela ezandleni zamaFilisti okweminyaka engamatshumi amane.

2 Umuntu othile waseZora, owayethiwa nguManowa, owosendo lwakoDani, wayelomfazi owayeyinyumba engelamntwana.

3 Ingilosi kaJehova yabonakala kuye yathi, “Uyinyumba kawulamntwana, kodwa uzathatha isisu ube lendodana. 4 Ngakho nanzelela ukuthi kawunathi wayini loba okunye okunathwayo okulemvubelo kanye lokuthi ungadli ukudla okungcolileyo, 5 ngoba uzathatha isisu uzale indodana. Akungabi lempuco esetshenziswa ekhanda layo, ngoba umfana uzakuba ngumNaziri, owahlukaniselwe uNkulunkulu kusukela ekuzalweni, njalo uzaqalisa ukukhululwa kuka-Israyeli ezandleni zamaFilisti.”

6 Emva kwalokho owesifazana lowo waya kumkakhe wamtshela wathi, “Kufike umuntu kaNkulunkulu kimi. Ubefana lengilosi kaNkulunkulu, esesabeka kakhulu. Angimbuzanga ukuthi ubevela ngaphi, njalo laye kangitshelanga ibizo lakhe. 7 Kodwa uthe kimi, ‘Uzathatha isisu uzale indodana. Khathesike unganathi iwayini loba okunye okunathwayo okulemvubelo, njalo ungadli lutho olungcolileyo, ngoba umfana uzakuba ngumNaziri kaNkulunkulu kusukela ekuzalweni kuze kube lusuku lokufa kwakhe.’ ”

8 UManowa wasekhuleka kuJehova esithi, “Awu Nkosi, ngiyakucela, umuntu kaNkulunkulu omthumileyo kabuye futhi azesifundisa ukuthi umfana ozazalwa wondliwa njani.”

9 UNkulunkulu wamuzwa uManowa, ingilosi kaNkulunkulu yafika njalo kowesifazana lowo esegangeni; kodwa umkakhe uManowa wayengekho. 10 Owesifazana lowo wagijima wayatshela umkakhe wathi, “Ukhona! Umuntu owabonakala kimi mhlalokhuyana!”

11 UManowa wasuka walandela umkakhe. Esefikile kulowomuntu, wathi, “Unguwe yini lowo owakhuluma lomkami?” Yena wathi, “Nginguye.”

12 Ngakho uManowa wambuza wathi, “Lapho amazwi akho esegcwalisekile, umlayo wokuphila lomsebenzi womfana uthini?”

13 Ingilosi kaJehova yaphendula yathi, “Umkakho kumele enze konke engimtshele khona. 14 Kangadli lutho oluvela evinini, loba anathe iwayini loba okunye okunathwayo okulemvubelo loba adle ukudla okungcolileyo. Kumele enze konke engimlaye khona.”

15 UManowa wathi engilosini kaJehova, “Sifuna ukuba uhlale size sikuhlabele izinyane lembuzi.”

16 Ingilosi kaJehova yaphendula yathi, “Loba lingangibamba ngamandla ukuba ngihlale, angiyikudla kudla kwenu. Kodwa uma lilungisa umnikelo wokutshiswa, unikeleni kuJehova.” (UManowa kananzelelanga ukuthi kwakuyingilosi kaJehova.)

17 UManowa waseyibuza ingilosi kaJehova esithi, “Ibizo lakho ngubani, ukuze sikubonge lapho ilizwi lakho seligcwalisekile?”

18 Yaphendula yathi, “Kungani ungibuza ibizo lami? Kaliqedisiseki.” 19 Lapho-ke uManowa wathatha izinyane lembuzi, ndawonye lomnikelo wamabele wakunikela kuJehova phezu kwedwala. Njalo uJehova wenza into emangalisayo uManowa lomkakhe bekhangele: 20 Kwathi ilangabi libhebha lisuka e-alithareni lisiya ezulwini, ingilosi kaJehova yenyukela phezulu iphakathi kwelangabi. Bebona lokhu uManowa lomkakhe bathi mbo phansi ngobuso.

21 Kwathi ingilosi kaJehova ingasazibonakalisanga futhi kuManowa lomkakhe, uManowa wananzelela ukuthi kwakuyingilosi kaJehova.

22 Wasesithi kumkakhe, “Silahliwe sizakufa. Sibone uNkulunkulu!”

23 Kodwa umkakhe waphendula wathi, “Aluba uJehova ubeqonde ukusibulala, ubengasoze amukele umnikelo wokutshiswa lomnikelo wamabele ezandleni zethu, loba asitshengise zonke lezizinto kumbe lalokhu asesitshele khona.”

24 Owesifazana wazala umfana wamuthi nguSamsoni. Wakhula loJehova wambusisa,

25 loMoya kaJehova waqala ukuqubuka phakathi kwakhe eseseMahane Dani, phakathi kweZora le-Eshithawoli.